Utilizziamo cookie per assicurarti una migliore esperienza sul sito. Utilizziamo cookie di parti terze per inviarti messaggi promozionali personalizzati. Per maggiori informazioni sui cookie e sulla loro disabilitazione consulta la Cookie Policy. Se prosegui nella navigazione acconsenti all’utilizzo dei cookie.
 
 
 
 
27.05.2007

Gotes de vita

La Maratona dles Dolomites à prejenté l’edizion 2007 tl Ciastel de Firmian a Bulsan sot l tema dles gotes. Scoles dla Val Badia é gnudes premiedes per i biei calendri enjignés sun l tema atual dla maioura roda ziclistica amatoriala dles Alpes. „Gotes“ é l tema che l comitê dla Maratona dles Dolomites à volù cerne per l’edizion de chest isté, la 21ejima te duta la storia dla gran roda di milesc ziclisć entourn l massif sugestif dl Sela. La domenia al 1. de messel 2007 saral indò passa 8.500 amanc dla roda che jirà - dantaldut per pascion - sun un di trei percursc prevedùs dal program (55 km, 106 km y 138 km).
Dant otedì, l 17 de mà, à l comitê d’organisazion dla Maratona dles Dolomites, invié al Ciastel de Firmian - che é senta dl MMM-Messner Mountain Museum de Bulsan - a la conferenza stampa dla edizion 2007 dla gran roda ziclistica. Anter i ghesć: l gestour y iniziadour dl MMM Reinhold Messner, l arpizadour di creps plu conesciù, y Alpidio Balbo, miscionar laich da Maran operatif per l ben dla puera jent tl’Africa ozidentala.

Na festa dles „gotes“ desvalies per scinché „gotes“ d‘ega y de speranza

I inviés y ghesć é gnùs touc su tl ćiastel soura Bulsan con n son de percuscions africanes, prejentedes dal musizist Max Castlunger. La conferenza stampa é gnuda tignuda tl salf dles manifestazions dl ciastel y museum.
La colaboradoura dl comitê dla Maratona Giò à daurì la conferenza con la letura de n test poetich dl jornalist y scritour Paolo Valente da Maran sun l’Africa. Con chesta merscia à l spetadour giaté n fil che l comitê à volù tré tres duta chesta edizion 2007 dla Maratona: l’importanza dles gotes y l impegn de solidarité per l’Africa che à ciarestia d’ega. Con n videoclip él spo vegnù prejenté i high-lights dles Maratones passedes, con inserimenc de sponsors y azions de promozion dantaldut sozial-umanitara.
L president dl comitê Michil Costa à spo saludé si colaboradours, i jornalisć y i scolés ruvés enchin sun chest col de Firmian - „Siegmundskron“ per tó pert a chesta manifestazion de informazion y ence de promozion.
L assessour provinzial de Südtirol al turism Thomas Widmann à mandé n comunicat de saluc y complimenc per la Maratona, scrit te valgunes risses ence per ladin, se scusen per ne podei nia ester prejent. Spo à rejoné Christoph Engl, l diretour dla SMG-Südtirol Marketing Gesellschaft: sun la valuta dla roda tl cheder turistich atual y futur de nosc luesc, veden l temp lede sun la roda y l’ativité con la roda fora per les montes y te na bela contrada sciche gran potenzial dl turism.

 

I uedli ouc sun Reinhold Messner y Alpidio Balbo

L apel de Messner é sté un, n soul y n sech: „I joufs dolomitics dess gnì scluc per valgugn meisc d’isté al trafich individual, i messon mete man de i pité a nosc ghesć finalmenter cultura alpina y chesta ne soporta nia vera y ajiament!“ L apel i é jù ai politics locai y ai capi dles trei provinzies competentes per l teritore: de Bulsan, Trent y Belun. Messner à ence dit che i monc n’é al dìdancuei nia demé plu n raion per escurscionisć y arpizadours, ma ence na atrazion per chi dla roda y ajache l temp lede sun la roda y l sport ziclistich é dldut ecologich déssen enjigné les strutures adeguades. Chest volessa dì en cajo mai ence trois aposta per chi dla roda - per che i escurscionisć ne vegne nia desturbés. Donca, aldò de Messner che é ence n espert de vita de mont y de economia de mont soura dut l mond, é les Alpes n raion de pesc y beleza naturalistica, y dut l potenzial turistich sta endoman demé te chisc doi fatours.
L president Michil Costa à volù sotrissé la valuta dla coejion soziala lieda a la manifestazion ziclistica: nia demé ziclisć da vigni cianton dl mond ruva tles valedes ladines per desfiré adum sun la roda i joufs dolomitics, ma ence entourn a 1.200 volontars y funzionars turistics da plu provinzies laora adum per n fin comun. La Maratona é na gran festa sun la roda y per la roda, y laprò él ence un di evenc sportifs plu importanc per l reclam dles Dolomites, con invic y prospec che ruva soura dut l mond y ence sies ores de trasmiscion direta sun la RAI. Ite tla coejion anter persones toma ence la solidarité, y a chesta ciala la Maratona de i dé na man: do l aiut dantaldut material dé dant da n ann al Tibet tres la sor dl Dalai Lama, Jetson Pema, àn pensé per chesta edizion de abiné adum con les iscrizions n contribut per l laour sozial tl’Africa de Alpibio Balbo. Balbo é n el da Maran, n boteghier. Dl 1969 i él sozedù n inzident stradal che l’à lié al let y l‘à condut a se impormete valch a se instes: „sce i valesce feje valch per i mutons che sofresc“. Dl 1971 él ruvé tl Togo/Africa per na sojornanza convalescenziala y al à podù vedei con si uedli tant mal che ala i jova a la jent y dantaldut ai mutons. Da ilò encà é l aiut per l‘Africa deventé n compit per sia vita, y te duc chisc 35 agn àl realisé tres sia miscion „grup miscionar Maran“ passa 7.000 poc (azion: n poz per l’Africa), infrastrutures y zentri sanitars per l Benin y l Ghana. Balbo à dit tla conferenza stampa a Bulsan: „ie son demé na persona sciche vos“ - cie che vuel dì che vignun de nos po dé sie contribut, y spo inant: „ence na gota d’ega refleteia na gran lum“ (zitat de Sor Teresa de Calcutta). Al dìdancuei à l’assoziazion de Balbo 6.000 membri sostegnidours te duta la Talia y ence colaboradours sun i posć olà che ai opereia. A Bulsan à la Maratona projeté sun l gran lenzuel n film curt dl laor umanitar dl grup miscionar da Maran tl’Africa. L secreter dla Maratona dles Dolomites Claudio Canins i à spo ence sourandé n assegn de 22.000,00 euro a „Pere Balbo“, scioldi che é gnus ite da la venuda dles chertes gold, platinum y „gotes de vita“ a les iscrizions dla Maratona 2007. N contribut, en chest iade de 4.200,00 euro, i é spo ence gnu sourandé a Stefan Leitner, funzionar dla „Südtiroler Sporthilfe“ sciche impegn per l sport y l sostegn di jovegn sportifs de Südtirol.

 

Cultura y scola ladina a la Maratona

L president dl‘Union di Ladins de Gherdeina, Egon Vinatzer, à prejenté a Bulsan la componenta culturala y ladina che sarà prejenta pro chesta edizion dla Maratona dl 1. de messel 2007. Tla televijion dla direta RAI gniràl mostré laour tradizional dla jent ladina, costum y cultura da si ponc plu tipics.
Te chesta ocajion dla prejentazion dla 21ejima edizion dla Maratona él gnù premié i doi grups dles scoles elementares y mesanes ladines che à venciù l concurs per enjigné n „calender“ sun l tema dles gotes te dutes sies formes.
Carantecater é stés i laours gnus prejentés dant a la juria metuda adum da set persones competentes. Per la categoria dles scoles elementares i é l prum pest ju a la cuinta classa dla scola elementara de Badia con la insegnanta Irene Zingerle, y per la sezion dles scoles mesanes i é l pest jù a n grup dla scola da San Martin de Tor sot a la professoura Roberta Sottara. L pest porom (por vigni mut) é sté de n iade al Gardaland con l azes ai moviestudios.
A la prejenza dles direturies Rosmarie Crazzolara y Claudia Canins y dl Intendent a les scoles ladines de Südtirol Roland Verra à les maestres conté sun l laour realisé y valch scolé à lit dant i pensiers ladins che ai à scrit ju per acompagné i dessegns di meisc.

(Iaco Rigo, La Usc di Ladins)

Gotes de vita
 Vai alla lista 
 
 



 
 
Il 5 per mille
al Gruppo Missionario Merano
codice fiscale: 91014610215
Come donare
Ogni aiuto al Gruppo Missionario Merano è prezioso, anche il più piccolo. Per le offerte, deducibili dalla dichiarazione dei redditi, è a disposizione il conto corrente postale 15004393.
Contatti
Gruppo Missionario Merano
via Foscolo, 1
39012 Merano - Italia
Tel. 0473 446400
Fax 0473 446400
E-Mail:
www.gruppomissionariomerano.it
 
produced by Zeppelin Group – Internet Marketing